हसता हसता डोळे अलगद भरूनही येतील
बोलता बोलता शब्द ओठी जातीलही विरून
कावरबावर होण्यासारखं बिलकुल काही नाही
कुणीतरी आठवण काढतंय बाकी काही नाही

रस्त्यामध्ये दिसतातच की चेहरे येता जाता
एका सारखेच दिसू लागतील बघता बघता
अवती भवती तेच माणूस दिसेल
सृष्टीमध्ये दोनच जीव आणखी कुणीच नसेल
भिरभिरल्यागत होण्यासारखं काहीच नाही
कुणीतरी आठवण काढतंय बाकी काही नाही

मोबाईल  वाजण्याआधी तो वाजल्या सारखा वाटेल
जुनाच काढून sms वाचावासा वाटेल
दिवस सरता वाटत जाईल उगाचच उदास
पावलोपावली उगाचच जड जाईल श्वास
घाबरून बिबरुन जाण्यासारखं काही नाही
कुणीतरी आठवण काढतंय बाकी काही नाही

जेवता जेवता जीवघेणा लागेलही ठसका
घरचे म्हणतील सारखा कसा लागतो उठता बसता
चेहरा लपवत डोळे पुसत पाणी प्यावे थोडे
बोलण्याआधी आवाजाला सांभाळावे थोडे
सांगून द्यावं काळजीसारखं बिलकुल काही नाही

कुणीतरी आठवण काढतंय बाकी काही नाही

वैष्णवी लोखंडे
पुणे